KDNJ, Vuçiqit: Të drejtat e njeriut nuk varen nga përmbushja e detyrimeve ndaj shtetit
Këshilli për të Drejtat e Njeriut (KDNJ) reagon ndaj qëndrimeve të Kryeministrit të Republikës së Serbisë, z.Aleksandar Vuçiq, të paraqitura në seancën parlamentare të 31 korrikut 2014.KDNJ vlerëson se tendenca e kreut të qeverisë për t’i kolektivizuar dhe etnizuar veprimet individuale qytetare ndaj shtetit, duke e përdorur gjuhën e urrejtjes ndaj shqiptarëve sikur komunitet kombëtar, paraqesin jo vetëm botëkuptimin e tij politik jocivilizues dhe jodemokratik, por janë sidomos në shpërputhje me detyrimet ligjore dhe kushtetuese të vendit.
“Rikujtojmë Kryeministrin e Republikës së Serbisë; se respektimi dhe jetësimi i të drejtave të njeriut, nuk varen nga përmbushja e detyrimeve qytetare ndaj shtetit, siç edhe e nënvizojnë dhe nënkuptojnë Neni 18 paragrafi 2 dhe Neni 19 i Kushtetutës së Republikës së Serbisë”, thuhet në reagimin e kësaj organizate me seli në Preshevë, transmeton Titulli.
KDNJ fton gjithashtu kryesuesen e Kuvendit Republikan, znj.Maja Gojkoviq, që ta respektoj rregulloren e punës së Kuvendit, në funksion të trajtimit të dinjitetshëm të secilit deputet dhe në përputhje me ligjet e Kushtetutën, të cilat e ndalojnë dhe ndëshkojnë diskriminimin dhe shprehjen e urrejtjes mbi baza racore, kombëtare dhe fetare etj.
Këshilli për të Drejtat e Njeriut fton të gjitha organizatat dhe institucionet relevante vendore e ndërkombëtare, që të reagojnë ndaj qasjes shqetësuese të kreut të ekzekutivit të vendit. /Titulli.com/
