Kandidati për kryeministër të Kosovës: Shqiptarët e Luginës së Preshevës do t’i kem lartë
Kandidati për kryeministër nga PDK, Enver Hoxhaj ka prezantuar palnin e tij edhe për shqiptarët e Luginës së Preshevës.
Postimi i plotë në Facebook nga Enver Hoxhaj
Si Kryeministër i ardhshëm i Republikës së Kosovës, shqiptarët e Luginës së Preshevës do t’i kem lartë në listën e prioriteteve të qeverisë së udhëhequr nga PDK-ja. Dëshmi për këtë janë shtatë zotimet që kam prezantuar sot në konferencën me gazetarë.
Si fillim, PDK do t’i përfshijë në listën për deputetë dy përfaqësues nga Lugina e Preshevës që e përfaqësojnë secilën komunë të Luginës, që zëri i shqiptarëve të kësaj zone të dëgjohet në Kuvendin e Kosovës. Gjithashtu, PDK-ja do ta marrë iniciativën që shqiptarët e Luginës të pajisen me letërnjoftimin dhe pasaportën e Republikës së Kosovës. Kjo do të realizohet përmes nismës së PDK-së për ta amandamentuar Ligjin për Shtetësinë e Kosovës.
PDK, si një parti e dalur nga lufta dhe me themele të forta patriotike, gjithmonë ka qenë e përkushtuar që t’ia zgjas dorën e përkrahjes vëllezerve dhe motrave tona të Luginës së Preshevës.
