Halimi: Brenda dy javësh me kryetar të ri të Trupit Koordinues

Sipas Halimit, duhet të zgjedhet kryetari i ri i Trupit Koordinues, duhet të ketë organizim më të mirë, problemet ekzistuese duhet të zgjidhen në mënyrë më serioze ndërsa pjesëmarrja e shqiptarëve në punën dhe përbërjen e këtij Trupi duhet të jetë shumë më e madhe. Problemi i vërshimeve dhe situatës së jashtëzakonshme në Serbi që ka tërhequr krejtësisht vëmendjen e qeverisë ka bërë që kjo çështje të mos zgjidhet deri tani.

"Kemi pasur biseda në fillim me kryetarin e qeverisë, me kryetarin e shtetit, me ministrin e drejtësisë dhe atë të arsimit, tani pritet të zgjedhet kryetari i ri, nuk ka arsye të pritet më tepër, ndërsa sa i përket kandidatit, kërkojmë të jetë një ministër nga lista e Partisë Përparimtare sepse përvoja ka treguar se kryetari paraprak nuk ka pasur forcë për zgjidhjen e problemeve", tha Halimi, raporton mepress.

Postin e kryetarit të Trupit Koordinues për Preshevë, Bujanoc dhe Medvegjë që nga qeveria e kaluar e mban Zoran Stankoviq./Titulli.com/

(Foto ilustrim: Riza Halimi (majtas) dhe Zoran Stankoviq)