Mustafi: Pa trajtimin e çështjes së shqiptarëve të Luginës s'ka marrëveshje?
Ragmi Mustafi, kryetar i Këshillit Kombëtar Shqiptar në Luginën e Preshevës, ka thënë se vizitën e përbashkët të Lajçakut dhe Escobarit në Kosovë i sheh si presion për përcaktimin e agjendës së dialogut.
Ai në “RTK Prime” ka thënë se pa trajtimin e çështjes së shqiptarëve të Luginës nuk do të mund të ketë marrëveshje përfundimtare ndërmjet Kosovës dhe Serbisë, por se tani është e vështirë të vjen në shprehje ndonjë reprocitet i të drejtave të shqiptarëve në Luginë me të drejtat e serbëve në Kosovë.
“Shqiptarët e Luginës së Preshevës që në vitin 2006 në platformën e përbashkët politike, në njërën nga pikat e saj theksojnë se duan që të kenë reciprocitet në kuptimin e të drejtave me serbët që jetojnë në Kosovë. Por këtë sot e shoh të pamundshme për t’u arritur për disa arsye. Vizitën e Lajçak dhe Escobar e shoh si një presion të shtuar të përcaktimit të një agjende, përkatësisht temave që duhet të trajtohen në të ardhmen. Por, nuk e shoh që mund të arrihet kaq shpejtë ndonjë zgjidhje për Asociacionin sepse në Serbi ka zgjedhje më 3 prill dhe në rast se ka vazhdim në këtë temë kjo nënkupton që ose duhet t’i sigurohet Vuçiqit që të arrijë një sukses të caktuar e që ta promovojë si një arritje të madhe në Serbi, e që nuk besoj se institucionet e Kosovës janë në gjendje që kaq shpejtë ta krijojnë Asociacionin dhe tjetra që është shumë e rëndësishme që nuk nuk mund të arrihet një marrëveshje përfundimare ndërmjet Kosovës dhe Serbisë pa e trajtuar edhe çështjen e Luginës së Preshevës”, ka theksuar Mustafi.
Sipas tij çëshjtja e shqiptarëve të Luginës është e patejkalueshme sepse pozita e tyre është peng i marrëveshjes ndërmjet Kosovës dhe Serbisë. Ai ka thënë se nëse shihet niveli i të drejtave që gëzojnë serbët në Kosovë është i pakrahasueshë me atë se çfarë gëzojnë shqiptarët në Luginën e Preshevës.
