Murati: Të bashkohen me Kosovën shqiptarët e Preshevës, Bujanocit dhe Medvegjës
Kryetari i Lëvizjes për Bashkim, Valon Murati ka mbajtur një konferencë për media. Murati deklaroi se letra e Presidentit Tramp dërguar Presidentit Thaçi përbën një moment shumë cilësor në procesin e ngufatur të bisedimeve, si në raportet brenda vendit, ashtu edhe në ato me Serbinë e me BE-në.
I pari i LB-së deklaroi edhe se bisedimet duhet të rezultojnë me ripërcaktim të kufijve në mes të Kosovës dhe Serbisë, duke u zbatuar parimi i vetëvendosjes së popujve.
“Shqiptarët në Kosovën Lindore: në Preshevë, Bujanoc dhe Medvegjë, kudo që janë shumicë dhe që kanë vazhdimësi territoriale me Kosovën duhet t’i bashkohen Kosovës. Serbët në Leposaviq, Zveçan dhe Zubin Potok duhet ta kenë të njëjtën të drejtë, aty ku janë shumicë dhe kanë vazhdimësi territoriale. Duke e respektuar këtë parim fshatrat shqiptare të Leposaviqit: Ceraja, Koshtova dhe Bistrica, të Zveçanit: Zhazha, Boletini dhe Kelmendi, si dhe Çabra në Zubin Potok duhet të mbesin pjesë e Kosovës. Gjithashtu pjesë e ripërcaktimit të kufijve nuk duhet të jetë pjesa veriore e qytetit të Mitrovicës, prej ku në vitin 2000 janë dëbuar 12.000 shqiptarë; dhe me heqjen e privilegjeve bllokuese për pakicën serbe, të cilat i përmban Kushtetuta e Kosovës” ka deklaruar Murati.
Në anën tjetër, Lëvizja për Bashkim e ka përkrahur Qeverinë e Kosovës për vënien e taksës 100% ndaj produkteve serbe.
“LB do të jetë anën e Qeverisë në këtë drejtim dhe kërkon që ajo të mos tërhiqet nga kjo politikë, madje këtë ta shtrijë edhe në drejtimet tjera deri në të drejta të plota politike në mes të shqiptarëve në Serbi e serbëve në Kosovë.
Vendimet e tilla të Kosovës padyshim që nuk duhet të jenë as popullsite e as inatçore, por të studiuara e analizuara mirë e mirë, në mënyrë që të kthehen në dobi të Kosovës, të qytetarëve të saj e të raporteve me fqinjët. Tash Qeverisë i mbetet të jetë e kujdesshme e të punojë shumë në evitimin e pasojave e efekteve negative të mundshme nga një politikë e tillë”, thuhet në njoftim.
