Molliqaj shpalos “faktet” që Konjufca ka qenë në SHIK, grumbullonte të dhënat që vinin nga Lugina e Preshevës
Deputeti i PSD-së, Dardan Molliqaj, ka paraqitur sot “faktet” të cilat sipas tij dëshmojnë se shefi i Grupit Parlamentar të LVV-së, Glauk Konjufca, ka qenë pjesë e SHIK-ut.
Molliqaj gjatë seancës së sotme tha se Konjufca ka shërbyer në këtë organizatë përgjatë vitit 2000-2001. “Pas shumë hipokrizive dhe shumë të pavërtetave që janë thënë na duhet të ballafaqohemi me të vërteta. Për deklaratën time të thënë në kuvend që njëri prej ish-kolegëve të mi, Glauk Konjufca, ka qenë shërbyes dhe anëtar i SHIK-ut, më duhet t’i jap informatat që e konfirmojnë. Viti kur Konjufca ka shërbyer në SHIK ka qenë 2000-2001. Paga është 150 marka. Rekrutimin e ka bërë Fadil Lepaja.
Sektori në të cilin ka punuar është përpunimi i të dhënave”, ka deklaruar ai. Molliqaj me këtë rast, ka thënë se vetë Konjufca kishte paraqitur para tyre një letër që kishte të bënte me SHIK-un. “Vetë letrat që kanë ardhur nga terreni, një prej letrave që Glauku e kishte ndarë me neve si histori ishin edhe të dhënat që vinin nga Lugina e Preshevës se kush ku po ndalet dhe gjitha ato letra që vinin me shkrim të dorës Glauku me kolegët e tjerë i përpunonin dhe i futnin në të dhënat e SHIK-ut”, ka nënvizuar ai. Deputeti i PSD-së gjatë fjalimit të tij ka thënë se Konjufca kishte vendosur ta braktiste SHIK-un për shkak të pagës jo të kënaqshme që merrte atë kohë. “Arsyeja e largimit të Glaukut nga SHIK-u ishte paga e ulët dhe pastaj vazhdoi dikah tjetër. Këto dhe shumë fakte të tjera tregojnë që Glauk Konjufca në këtë periudhë ka qenë zyrtar në strukturat e SHIK-ut.
E kam parë që Glauku bashkë me bashkëpuntorët e tij të parë po hezitojnë të ballafaqohen me të vërtetën. Në vetvete nuk e kam problem që dikush ka qenë në SHIK”, ka potencuar ai. Më tej, Molliqaj i bëri thirrje ish-bashkëpartiakut të tij që të dalë dhe ta pranojë të vërtetën, respektivisht të ballafaqohet me të kaluarën e tij. “Unë besoj që SHIK-u si organizatë ka kryer veprime kriminale. Por nuk besoj që secili person në SHIK ka bërë një gjë të tillë. Por arsyeja pse po i them këto është se dikush që akuzon e vetë ka qenë aty është hipokrizi.
E dikush që nuk guxon ta pranojë të kaluarën e vet ai person është i rrezikshëm në politikë sepse ai person sigurisht që do ta bëjë edhe veprimin tjetër duke e fshehur të parin”, u shpreh Molliqaj. Ndërkohë, pak para se kryesuesi i seancës t’ia ndërprente fjalën, Molliqaj i bëri thirrje Konjufcës që të shkojë te Burdushi, mirëpo thirrja e tij në këtë drejtim mbeti në gjysmë, pasi që Xhavit Haliti konsideroi se Molliqajt i kishte përfunduar koha e deklarimit. “Glauk nuk të shpëton Kadria, nuk të shpëtojnë as njerëzit e tjerë të SHIK-ut, të shpëton e vërteta.
Glauk ta kanë lëshuar Burdushin prej brugut dhe mund të shkosh....”, ka potencuar ai pak para se t’i ndërpritej fjala./Zeri/
