Maloku: KKSH-në thellësisht duhet ndërruar

"Nëse i referohemi Konventës së Këshillit të Evropës për të Drejtat e Pakicave Kombëtare, mbi të cilën Konventë mund të themelohen Këshillat Kombëtare të pakicave mund të them se, Këshilli Kombëtar i Shqiptarëve në Serbi nuk ka mbuluar nevojat e shqiptarëve. Lëmi i arsimit, përdorimit të simboleve kombëtare dhe të gjuhës, por edhe kultura e informimi nuk kanë pasur ecurinë e nevojave dhe kërkesave të shqiptarëve në Luginë. Shteti i Serbisë përveç se ka kujdestaruar punën e KKSH-së, ajo edhe ka penguar kërkesat dhe nevojat e shqiptarëve.”  thekson Maloku. 

Ai konsideron se të gjitha subjektet politike shqiptare duhet të ndajnë mendim të njëjtë në lidhje me participimin e tyre në zgjedhjet për KKSH.   

"Konsiderojë se subjektet politike, por edhe lidershipi shqiptar në Luginë duhet të ndajnë mendim se forma dhe kapacitetet e Këshillit Kombëtar Shqiptar duhet ndërruar thellësisht, nëse vendoset të participohet në zgjedhjet e përfaqësuesve për këtë organ. Pjesëmarrja në zgjedhje për KKSH, në kapacitetin aktual të këtij organi, të pakicave që mbulon fusha të rëndësishme identitare për kombin shqiptar në Serbi, nuk do të sjell asgjë të re për shqiptarët atje", tha Albinot Maloku për portalin informativ Titulli. 

Më tej Maloku theksoi se, "Prej themelimit të Këshillit Kombëtar Shqiptar në Serbi, në asnjë fushë asgjë nuk u ndryshua. Shteti i Serbisë u ka bërë probleme në çdo segment që mbulon KKSH-ja, pra në arsim, në kulturë, në informim si dhe në përdorimin e simboleve kombëtare e të gjuhës shqipe. Andaj nuk e shoh me shumë prioritet marrjen pjesë të shqiptarëve në këto zgjedhje, përderisa nuk është vërejt asnjë ndryshim."/Titulli.com/