Kryeparlamentarja serbe në Tiranë, Meta: Të drejtat e shqiptarëve në Preshevë, faktor i rëndësishëm (Video)

Në përfundim të takimit, Meta tha se kjo vizitë i shërben intensifikimit të mardhënieve Shqipëri-Serbi.

"Do të punojmë akoma më shumë që ky vullnet pozitiv të materializohet në një angazhim edhe më konkret reciprok për avancimin e projekteve madhore, që i shërbejnë ndërlidhjes rajonale, sidomos në fushën e infrastrukturës, energjisë dhe thithjes së investimeve të huaja.Përsa i përket popullsisë shqiptare në Luginën e Preshevës është e natyrshme që ajo ka një domethënie të veçantë për Shqipërinë dhe për popullin tonë. Dua të ritheksoj se ne e shohim mirëqënien dhe integrimin me të drejta të plota të minoritetit shqiptar në Serbi, si një gur themeltar të rëndësishëm të marrëdhënieve midis dy vendeve, dhe si një urë të fortë bashkëpunimi dhe miqësie midis nesh. Pjesëmarrja gjithnjë e më e madhe e shqiptarëve në vendimmarrjen politike dhe sociale të Serbisë, i shërben konsolidimit të partneritetit rajonal mes dy vendeve tona", tha Meta, raporton Top channel.

Zonja Gojkoviç deklaroi se bashkëpunimi mes dy vendeve duhet të përqendrohet në tre çështje; atë ekonomike, marrëdhëniet bilaterale dhe integrimin. 

Meqënëse Shqipëria dhe Sebia, - tha zonja Gojkoviç, - ndajnë një aspiratë të përbashkët, aderimin në Bashkimin Europian, të dy komisionet parlamentare të integrimit duhet të intensifikojnë bashkëpunimin. 

Kryetarja e Parlamentit të Serbisë u prit edhe nga Presidenti Bujar Nishani dhe Kryeministri Edi Rama.

Takimi me presidentin Nishani 

Presidenti i Republikës Bujar Nishani priti në një takimkryeparlamentaren e Serbisë, zonjën Maja Gojkoviç, e cila ndodhet në një vizitë zyrtare në Shqipëri. 

Presidenti Nishani shprehu kënaqësinë për këtë vizitë dhe u shpreh se mes dy vendeve ka një mundësi për të rigjallëruar bashkëpunimin si në aspektin dypalësh, ashtu edhe në kuadër rajonal. Presidenti Nishani theksoi se klasa politike ka detyrimin dhe përgjegjësinë për të përçuar qartësi dhe ndjenjën e miqësisë dhe bashkëjetesës për brezat e rinj. 

“Vetëm përmes mirëkuptimit, bashkëpunimit dhe mirëbesimit, vendet e rajonit mund të ndërtojnë një të ardhme më të mirë për popujt e tyre” – u shpreh Presidenti Nishani.

Kreu i Shtetit vlerësoi Memorandumin e nënshkruar nga Kryeministrat e të dy vendeve për bashkëpunimin rinor, sipas modelit franko-gjerman, duke shpresuar të shohim impaktin konkret pozitiv për të rinjtë e të dyja vendeve, e veçanërisht në raport me studentët shqiptarë të Luginës së Preshevës që kanë studiuar në Shqipëri dhe kthehen për të punuar në Serbi. /Titulli.com/