Qeveria e Serbisë zvogëlon buxhetin për Këshillin Kombëtar Shqiptar

Qeveria e Repiblikës së Serbisë edhe këtë vit zvogëlon buxhetin për Këshillin Kombëtar Shqiptar, ka njoftuar kryetari i këtij institucioni Enkel Rexhepi.

Postimi i tij në Facebook:  

Vendimi për mënyrën e ndarjes së buxhetit këshillave të pakicave kombëtare edhe një herë shpërfaqë politikën e saj konsistente diskriminuese ndaj shqiptarëve. Ashtu sikur për vitin 2024 edhe për këtë vit, me zvogëlimin e financimit të rregullt nga Ministria, Qeveria e Serbisë tenton në mënyrë direkte të vështirësoj funksionimin normal të institucionit të vetëm përfaqësues të shqiptarëve. 

Kjo, përveç se goditje ndaj Këshillit Kombëtar Shqiptar, më tepër është vazhdimësi e agjendës së qartë politike të shtetit serb ndaj shqiptarëve, e që dëshmohet edhe kësaj rradhe që është diskriminuese. 

Nga Vendimi i Ministrisë, buxheti për këshillat e pakicave në krahasim me vitin e kaluar, është zvogëluar për 166.163 dinarë. Apo nga 306.152.327 dinarë sa ka qenë për 2024, për këtë vit është 305.986.164 dinarë. 

Nga shuma e zvogëluar për të gjitha Këshillat, 47% apo 78.223 dinarë i është zvogëluar buxheti vetëm Këshillit Kombëtar Shqiptar.

Pra nga shkurtimi i buxhetit për këshillat e pakicave, afër gjysma e asaj shume i ulet vetëm Këshillit Kombëtar Shqiptar.