Gazetarët, udhëheqësisë së Bujanocit: Po shkelni Ligjin dhe Rregulloren

“Koalicioni i shoqatave të gazetarëve dhe mediave po përcjellë thirrjet publike në të gjitha komunat dhe qytetet, dhe në rast se thirrjet nuk janë në përputhshmëri me Ligjin dhe Rregulloren, i njofton dhe jep udhëzime për përmirësimin e tyre”, thuhet në kumtesën e lëshuar të enjten nga UNS,NUNS, NDNV, ANEM dhe Lokal Pres. 

Edhe përskaj njoftimeve të Koalicionit dhe vërejtjeve në parregullsi, komuna Doljevac, Aleksandrovac, Bujanoc dhe Krupanj thirrjet e tyre publike nuk i kanë në përputhje me Ligjin dhe Rregulloren. 

Koalicioni, përmes kumtesës njofton se nuk do të marrë pjesë në konkurset e hapura për procedim që nuk janë në përputhshmëri me rregulloret dhe kështu as nuk do të dërgoj kandidatët për komisione në këto komuna. 

“Koalicioni i shoqatave të gazetarëve dhe mediave, pas monitorimit në thirrjet publike do të njoftojë Ministrinë e Kulturës dhe Informimit rreth të gjitha parregullsive të regjistruara”, shkruhet në fund të kumtesës. 

Vlen theksuar se portali informativ Titulli.com pat paralajmëruar Komunën e Bujanocit, respektivisht kryetarin Nagip Arifi për shkeljet e bëra me rastin e propozimit të anëtarëve për formimin e Komisionit për vlerësimin e projekteve për informim, të cilin më vonë është detyruar ta shkarkoj. 

Sipas kumtesës së Koalicionit të shoqatave të gazetarëve dhe mediave, komuna e Bujanocit edhe me thirrjen e re për konkurs ka bërë shkelje të Ligjit dhe Rregullores përkatëse. /Titulli.com/

>>Këshilli Komunal krye në vete, formon komision në kundërshtim me rregulloren!

>>Arifi detyrohet të shfuqizojë Komisionin për media