Bashkërisht për zhvillim ekonomik në Luginë të Preshevës, pushtetet lokale të paafta (video)

Zhvillimi ekonomik në Luginën e Preshevës është cilësuar ndër elementet kryesore për tejkalimin e krizës dhe ndërprerjen e largimit të të rinjve shqiptarë nga kjo zonë.

Përfaqësues të Fondit Humanitar të Kosovës Lindore, në një debat me qytetarë të Luginës, kanë paralajmëruar fillimin e aktivitetit të tyre në drejtim të zhvillimit ekonomik, por kanë ftuar përfaqësuesit politik dhe  institucional që bashkërisht të punojnë në jetësimin e  këtij projekti.

Xhelal Memeti, kryetar i Fondit Humanitar të Kosovës Lindore, duke shpjeguar rrjedhën e projektit 100 shtëpi për Luginën, ka thënë se më shumë se 100 shtëpi, shqiptarët e kësaj zone kanë nevojë për zhvillim ekonomik.

Riza Halimi, deputet në parlamentin republikan të Serbisë, ka akuzuar Serbinë, për limitimin e mundësive të financimit të komunave të Luginës me mjete nga projektet e ndryshme republikane dhe ndërkombëtare, ndërkohë që nuk i ka kursyer edhe pushtet lokale për paaftësitë e tyre të hartimit të projekteve konkurruese për zhvillim ekonomik.

Fondi Humanitar i Kosovës Lindore, përgjatë dekadës së fundit ka arrit që të financoj qindra  studentë të Luginës me bursa studentore, të  realizoj më se 40% të projektit “100 shtëpi për Luginën e Preshevës”, ndërsa  së fundit ka nisur projektin për zhvillimin ekonomik si domosdoshmëri e kohës./Titulli.com/