Bujanoc, aksion për të ndihmuar 5 jetimët e Podujevës (foto)
Dy të rinj bujanocas kanë marrë aksion për të ndihmuar pesë fëmijë jetimë me kushte të rënda jetese.Betim Ejupi e Ilir Halili nga komuna e Bujanocit, gjatë ditës së premte, me vetiniciativë, buzë rrugës kishin vendosur tavolinën me fotografinë e fëmijëve pa prindër nga fshati Llaushë i komunës së Pudujevës.
“Ndihmo edhe ti, këta fëmijë kanë nevojë për ndihmën tonë” ishte lutja e dy vullnetarëve.
Betim Edjupi, i tha portalit informativ Titulli.com, se për këtë solidarizimi vendosi pasi kishte parë rastin në mediat e Kosovës.
“Deshëm që një ndihmë të vogël, jetimëve nga Podujeva, t’ia dorëzojë edhe Bujanoci. Rasti në fjalë na ka prekur shumë”, u shpreh Betimi, të cilin së bashku me Ilirin nuk e pengonte moti i ftohtë.
Vullnetarët thanë se nuk e dinë adresën e fëmijëve, mirëpo ky do të jetë problemi më i vogël për t’i dorëzuar ndihmën e grumbulluar.
Prindërit i vdiqën brenda një kohe të shkurtë
Nëna u vdiq para disa muajve, babai para dhjetë ditësh. Barra e familjes bie mbi 15-vjeçaren.
Jetojnë në një shtëpi të vogël dydhomëshe, të ftohtë sikurse jetët e banorëve që strehohen aty.
Një korridor i errët ndan dy dhomat. Muret e çara në shumë vende e të kapluara nga lagështia, dhe rrobat e varura në disa tela, janë panorama e zymtë që ofron kjo shtëpi.
Në njërën dhomë gjenden dy shtretër e një copë tepihu, ndërsa në tjetrën vetëm një copë tepihu e disa rroba të shpërndara, të cilat të tërhiqnin vëmendjen porsa hyje brenda në atë shtëpi.
Kjo është streha e vetme e pesë fëmijëve të mbetur jetimë. Dita për zbardhet duke menduar se çfarë do të kenë në tryezë për të ngrënë, e kur nata vjen, gjumi i zë duke menduar se si do t’ia bëjnë për ditën e nesërme. Këtë fat e ka familja Halili nga fshati Llaushë, komuna e Podujevës.
Edhe pse në moshë të re, diku rreth 15 vjeçe, Egzona motra më e madhe ishte e vetëdijshme për një gjë të tillë.
“Jemi pesë fëmijë, tre djem dhe dy vajza. Unë jam fëmija më i madh. Jam në klasën e nëntë. Nëna na ka vdekur disa muaj më parë, nga një sëmundje, ndërsa babai ka vdekur tani qe dhjetë ditë, dhe kemi mbetur tani kështu të vetëm e pa prindër”./Titulli.com/
