Malësia e Bujanocit cakton datën për "Takimin e Vendlindjes"

Këshilli Organizues në dy mbledhjet e mbajtura ka caktuar 3 gushtin e këtij viti si datë për zhvillimin e takimit tradicionalë “Takimi i Vendlindjes-Zarbica 2014”.

Në njoftimin e organizatorëve të arritur në redaksinë e portalit informativ Titulli ndër të tjera thuhet se për këtë takim “ka qenë interesim i banorëve të shumtë të ndjekur e të shpërngulur nga fshatrat e Malësisë së Bujanocit: Zarbicë, Priboc, Novosellë, Suharrën, Ramabuqë, Çarr, Gjergjec  etj.”

Takimi tradicional sipas Këshillit organizues do të mbahet në fshatin Zarbicë, përderisa njëherit do të përkujdesen edhe për problemet që mund të paraqiten për banorët e këtyre trevave të cilët posedojnë dokumente të Kosovës e që për të ardhur në vendlindje duhet të kalojnë kufirin në Muhoc, për të cilat theksojnë se do të tejkalohen./Titulli.com/

*******************************************************************************************************************************************************************

KËSHILLI ORGANIZUES I TAKIMIT TË VENDLINDJES –ZARBICA 2014

N J   O   F   T   I   M

Duke pasur parasysh interesimin e banorëve të shumtë të ndjekur e të shpërngulur nga fshatrat e Malësisë së  Bujanocit: Zarbicë, Priboc, Novosellë, Suharrën, Ramabuqë, Qarr, Gjergjec  etj., këto ditë, nga përfaqësues të këtyre fshatrave, është formuar Këshilli Organizues për mbajtjen e Takimeve të Vendlindjes në fshatin Zarbicë. 

Ky Këshill Organizues  ka filluar punën në përgatitjen e këtij takimi duke formuar edhe grupet punuese  për veprimtaritë që do të organizohen në këtë takim të Vendlindjes.

Pengesat e qarkullimit të lirë që janë paraqitur kohë pas kohe në kalimin e kufirit në pikën kufitare në Muhoc, për disa banorë të fshatrave të Malësisë me dokumente të Kosovës, besojmë se janë të tejkaluara dhe jemi të bindur se ky takim i Vendlindjes në fshatin Zarbicë  do të jetë një nga takimet  më  të organizuara dhe më madhështore deri më tash. 

Në dy mbledhjet e mbajtura nga Këshilli Organizues për “Takimin e Vendlindjes – Zarbica 2014”, përveç tjerash është vendosur që, takimi  të mbahet, më 03. 08. 2014 në fshatin Zarbicë.

Për punën dhe mbarëvajtjen e Takimit të Vendlindjes, Këshilli Organizues do ta njoftojë  opinionin  publik në vazhdimësi. 

Gjilan, 06. 07. 2014                                          Sektori për Informim i

                                                                        Këshillit  Organizues

                                                           “Takimit të Vendlindjes-Zarbica 2014”