Departamenti i Shtetit amerikan shpreson në një marrëveshje Kosovë – Serbi ditëve në vijim
Një zëdhënës i Departamentit amerikan të Shtetit ka thënë se Shtetet e Bashkuara shpresojnë që Kosova dhe Serbia “të arrijnë një marrëveshje në ditët në vijim me mbështetjen e përfaqësuesit të Posaçëm të Bashkimit Evropian”.
BE-ja ka ftuar kryeministrin e Kosovës, Albin Kurti dhe presidentin e Serbisë, Aleksandar Vuçiq, për një takim në Bruksel në një përpjekje për të gjetur një zgjidhje për situatën në veriun e Kosovës, të cilën zyrtarët evropianë kanë cilësuar më të rrezikshmen që nga viti 2013.
“Shpresojmë që të dyja palët të arrijnë marrëveshje në ditët në vijim me mbështetjen e një përfaqësuesi special të Bashkimit Evropian. Ne po i mbështesim në mënyrë aktive ato përpjekje”, ka thënë Departamenti i Shtetit për Zërin e Amerikës.
Takimi në Bruksel, sipas burimeve të KOHËS, pritet të zhvillohet të dielën në mbrëmje ose të hënën gjatë ditës.
Më 21 nëntor skadon afati i masave qortuese për serbët që nuk konvertojnë targat ilegale në RKS. Pas kësaj date, hynë në fuqi masa e gjobitjes prej 150 eurosh. Ndërkombëtarët po nxitojnë të zgjidhin çështjen e targave para të martës.
