Arrestohet spiuni kinez, vodhi të dhënat e Inteligjencës Artificiale

Një ish-inxhinier softueri i Google është vënë nën akuzë në Shtetet e Bashkuara për vjedhjen e sekreteve tregtare në lidhje me inteligjencën artificiale, ndërsa punonte fshehurazi për dy kompani kineze.

Linwei Ding, i njohur gjithashtu si Leon Ding, u padit në Kaliforni me katër akuza dhe u arrestua të mërkurën. Shtetasi kinez dyshohet se ka vjedhur më shumë se 500 dosje konfidenciale.

Nëse shpallet fajtor, ai përballet me 10 vjet burg dhe 250.000 dollarë gjobë për secilën akuzë.

Informacioni që ai akuzohet se ka marrë ka të bëjë me infrastrukturën e qendrave të të dhënave superkompjuterike të Google, të cilat përdoren për të pritur dhe trajnuar modele të mëdha të AI.

Sipas aktakuzës, Ding u punësua nga Google në vitin 2019 dhe përgjegjësitë e tij përfshinin zhvillimin e këtij softueri.

Ai dyshohet se filloi të ngarkonte informacione të ruajtura në rrjetin e Google në një llogari personale të Google në maj 2022. Këto ngarkime vazhduan periodikisht për një vit.

Ndërkohë, ai thuhet se ka kaluar disa muaj në Kinë, duke punuar për “Beijing Rongshu Lianzhi Technology”, një kompani teknologjie, madje ai dyshohet se ka krijuar dhe firmën e tij “Shanghai Zhisuan Technology”, e cila kishte një fokus në AI dhe mësimin e makinerive, dhe e bëri veten CEO.