Arifi: Pasivizimi i adresave ishte çështja kryesore e takimit me ambasadorin Hill

Ambasadori i SHBA-së në Serbi, Chris Hill, ka takuar kryetarin e komunës së Preshevës, Shqiprim Arifi, transmeton Titulli.com.

Arifi bëri të ditur se temë kryesore gjatë takimit me Hillin ishte pasivizimi i adresave të shqiptarëve në Luginë, për të cilin tha se ambasadori amerikan ishte i informuar për problemet.

"Duke njohur ndikimin e thellë dhe nevojën urgjente për zgjidhje, diskutimi u përqendrua mbi çështjen e pasivizimit të adresave - sfida e përditshme me të cilën po përballen qytetarët e Luginës. Fokus i veçantë në takim ishte edhe hapja e vendkalimit kufitar Miratoc - Llojan", ka sqaruar Arifi.

Sipas Arifit u theksua gjithashtu edhe nevoja e rëndësishme për të kultivuar një mjedis miqësor ndaj investimeve, veçanërisht në sferën ekonomike e cila ndikon drejtpërdrejt në përmirësimin e jetës së qytetarëve tanë.

Ai u shpreht se me ambasadorin Hill kanë folur për shifra konkrete, ku sipas tij, deri më tani janë 10 mijë shqiptarë, adresa e të cilëve është pasivizuar./Titulli.com/