Të gjitha truket për të mos u thumbuar nga mushkonjat
Mushkonjat tërhiqen nga të gjithë njerëzit. Megjithatë është e pamohueshme që ka disa individë që janë më tërheqës ndaj insekteve të bezdisshme.
Nuk ka asnjë arsye të vetme pse disa njerëz pickohen më shumë se të tjerët dhe shkenca nuk ka dhënë ende përgjigje përfundimtare për këtë pikë, sepse tema nuk është e lehtë për t’u studiuar.
Megjithatë, ekspertët kanë identifikuar dy kategori faktorësh që na bëjnë më tërheqës për mushkonjat: ata biologjikë , të cilët nuk mund t’i ndryshojmë dhe ata të sjelljes, mbi të cilët kemi një farë lirie.
Duke ndryshuar disa nga sjelljet tona është e mundur që edhe ato të mbahen larg.
Aroma e trupit
Faktori kryesor biologjik është aroma. Era e një personi është unike, dhe dhjetëra molekula bashkohen dhe konkurrojnë së bashku për të krijuar atë. Ka shumë të ngjarë që të jetë një përzierje e veçantë kimikatesh që tërheq mushkonjat. Është gjithashtu e mundur që disa individë të lëshojnë sasi më të mëdha të aromës që pëlqejnë aq shumë mushkonjat, duke u bërë kështu objektivat e tyre të preferuara.
“Kjo nuk do të thotë që një person veçanërisht i parfumosur, sipas mendimit të njerëzve të tjerë, do të jetë domosdoshmërisht në shënjestër të insekteve”, tha Lindy McBride, profesore e biologjisë evolucionare dhe neuroshkencës në Universitetin Princeton.
“Sepse mushkonjat janë të ndjeshme ndaj llojeve të ndryshme të aromave, madje edhe atyre që njerëzit nuk mund t’i dallojnë. Mushkonjat, për shembull, e duan erën e parakrahut por kjo s’do të thotë se dikush duhet medoemos të mendojë se krahët e tyre kanë erë të keqe”, shtoi ajo.
Sebum dhe gjak
Mushkonjat tërhiqen nga sebumi , një substancë vajore që gjendet në lëkurë që mbron nga dehidratimi, e përbërë nga një sërë molekulash që kontribuojnë në formimin e aromës së individit. Mushkonjat duket se tërhiqen më shumë nga njerëzit me grupin e gjakut O. Shkenca ende nuk e ka konfirmuar këtë zbulim. Në fakt, studimet në përgjithësi përfshijnë një lloj mushkonjash dhe nuk është e mundur të përgjithësohet për të gjitha speciet.
Frymëmarrja
Edhe mënyra se si merrni frymë mund të ndihmojë në tërheqjen e mushkonjave, sepse këto insekte kërkojnë dioksid karboni (dhe kjo është një nga arsyet pse janë të mirë për të na gjetur ne njerëzit). Sa më shumë marrim e nxjerrim frymë, aq më shumë dioksid karboni dërgojmë në ajër dhe është një e dhënë e rëndësishme që u japim mushkonjave, duke i vendosur ato në rrugën e duhur.
Stërvitje në natyrë
Disa sjellje të zbatuara gjatë ditës mund të tërheqin më shumë mushkonja. Për shembull, një stërvitje intensive jashtë do të çojë në nxjerrjen e më shumë dioksidi karboni, çka mund të tërheqë mushkonjat. Për më tepër, djersa u dërgon mushkonjave një sinjal të fuqishëm, veçanërisht nëse vazhdon për disa orë, duke u përzier me bakteret në lëkurën tonë. Përbërjet e djersës ndryshojnë nga personi në person dhe për këtë arsye ka individë që janë më tërheqës se të tjerët (gratë shtatzëna i nënshtrohen më shpesh kafshimit të tyre). Sipas një studimi të publikuar në Cell , është aroma acidike e lëkurës ajo që vepron si magnet për mushkonjat.
Birra dhe pijet alkoolike
Edhe pirja e birrës ose alkoolit mund të na bëjë më tërheqës për mushkonjat. Në përgjithësi, alkooli shkakton një rritje të temperaturës së trupit dhe si pasojë djersitje, gjë që e pëlqejnë shumë mushkonjat. Alkooli gjithashtu mund të ndryshojë përbërjen kimike të erës së trupit (dhe djersës), gjë që mund të tërheqë mushkonjat.
Parfume dhe kremra kundër diellit
Disa parfume, sapunë dhe madje edhe kremrat kundër diellit mund të tërheqin mushkonjat. Se çfarë janë këto parfume nuk është plotësisht e qartë dhe rezultatet e studimeve nuk mund të përgjithësohen sepse gjithçka varet nga ndërveprimi midis erës së individit dhe produktit të përdorur, si dhe nga lloji i mushkonjave. Kur jeni jashtë, atëherë është më e sigurt të përdorni kremra dhe losione pa aromë ose akoma më mirë, shmangni përhapjen e produkteve në lëkurën tuaj.
Rrobat
Disa ngjyra të veshjeve si e zeza dhe bluja mund të veprojnë si një magnet për mushkonjat të cilat gjithashtu duket se e duan të kuqen dhe portokallinë. Prandaj është më mirë të zgjidhni rroba me ngjyrë të çelët, mundësisht me mëngë të gjata dhe pantallona. Nëse nuk ju pëlqen të aplikoni repelent direkt në lëkurën tuaj, mund t’i spërkatni rrobat tuaja me një insekticid si permethrin, një metodë e përdorur nga ushtria. Kjo është një mënyrë efektive për të parandaluar që mushkonjat të kafshojnë lëkurën e mbuluar nga veshjet e trajtuara. Ekspertët pajtohen se mënyra më e mirë për të mbajtur larg mushkonjat është përdorimi i një repelenti të mirë.
Këmbët dhe kyçet
Megjithatë, këmbët dhe kyçet janë pjesa e trupit që “vizitohet” më shpesh nga mushkonjat. Kjo ndodh sepse mushkonjat pëlqejnë të gumëzhijnë afër tokës. Këshilla më logjike është të vishni këpucë të mbyllura me çorape të shkurtra, por për zonjat nuk është gjithmonë e mundur. Të paktën kur darkoni dhe për rrjedhojë qëndroni në këmbë, sugjerimi është të vendosni një ventilator poshtë tavolinës për të vështirësuar fluturimin e mushkonjave. “Aq sa duken të pathyeshme dhe pafundësisht të bezdisshme”, – thotë biologia Lindy McBride – “ato nuk janë shumë të mira në fluturim“.
