Kryeministri Rama njofton për programin e veçantë për emigrantët që duan të investojnë në Shqipëri
Kryeministri i Shqipërisë, Edi Rama, njoftoi sot për një program të veçantë për të gjithë emigrantët shqiptarë që duan të investojnë kursimet e tyre në fshatra dhe zona malore të Shqipërisë.
“Ne po bëjmë gati këto kohë një program të veçantë për të gjithë emigrantët shqiptarë që duan të investojnë kursimet e tyre në fshatra dhe zona malore të Shqipërisë, për t’i kthyer shtëpitë dhe trojet atje në hallka të zinxhirit tonë të ri të turizmit”, tha Rama në takimin e mbajtur në Athinë, me shqiptarët që jetojnë e punojnë në Greqi.
Shembujt, shtoi kryeministri, i kemi nga Thethi dhe Valbona, në Tepelenë dhe në Përmet, ku me kursimet e punës në emigracion dhe falë dijes, eksperiencës, kulturës së punës së fituar larg shtëpisë ata që janë kthyer nga mërgimi kanë hapur agroturizme dhe bujtina që janë plot me turistë, të cilat u sjellin në bilancin e fundvitit shumë më shumë të ardhura sesa paga e emigracionit.
“Disa janë kthyer për fare, disa të tjerë jetojnë mes shtetit ku janë dhe vendlindjes, por të gjithë e shohin se llogaria del për bukuri dhe investimi në vendlindje shpërblehet më së miri”, u shpreh ai.
Kryeministri deklaroi se Shqipëria e 2030-ës, do të jetë një vend i zgjedhjes së lirë.
Shqipëria e 2030-ës do të jetë një vend i zgjedhjes së lirë, por jo më i detyruar nga halli apo nga pamundësia për të gjithë ata shqiptarë që do të mendojnë ta kërkojnë fatin e tyre gjetkë si njerëz të lirë të kësaj bote, ku kufijtë e vendlindjes dhe shteti ku kalon fëmijëria deri në moshën për të marrë vendime, nuk mund të jenë pengesë për askënd që spostohet drejt horizontesh dhe realitetesh të reja, përtej mjegullës së dezinformimit që përcjell lajme të fabrikuara ditë e natë nga mendjet më të liga shqiptare, mendjet e liga që i kemi nga mbrapa qysh nga viti 1912 që ndryshojnë emrin e njeriut, ndryshojnë formën e njeriut, por nuk ndryshojnë në përmbajtjen e tyre dhe flasin të njëjta gjëra përmes gjuhës së njerëzve të ndryshëm”, u shpreh Rama, transmeton atsh, përcjell albinfo.ch.
Këtu, Rama solli si shembull rënien e popullsisë së Shqipërisë në 1.5 milionë përtej tymit të zi të luftës politike me fenomenin e emigracionit që në kohë dhe cikle të ndryshme i ka prekur të gjithë vendet e kësaj bote, e jo më pastaj Shqipërinë që doli pas gjysmëshekulli burg, nga një burg ku çelësat ishin hedhur në det.
“Përtej të gjitha projekteve, reformave, punë dhe mundësive të reja dhe përtej të gjitha krahinave, besimeve, bindjeve dhe pëlqime politike është sot e gjitha e arritshme për t’u zotëruar si vullnet i gjithë shqiptarëve kudo ndodhen, maja e Shqipërisë 2030”, deklaroi Rama.
