Kosovë, arrestime për incidentin në Dobrosin

Lokale

Kosovë, arrestime për incidentin në Dobrosin

04.Jul.2012 08:26

Dy persona akuzohen për përfshirjen në incidentin mes Kosovës dhe Serbisë

Misioni i Bashkimit Evropian për sundimin e ligjit në Kosovë, bëri të ditur se dy persona janë dërguar në paraburgim, nën dyshimet për përfshirje në një incident të pasqaruar në zonën kufitare ndërmjet Kosovës dhe Serbisë. Tre të tjerë janë urdhëruar të paraqiten në stacionin e policisë dhe u janë marrë pasaportat. Të gjithë këta, janë arrestuar më 1 korrik nga policia e EULEX-it dhe janë akuzuar për siç thuhet, “kryerje të veprës terroriste dhe pjesëmarrje në grup terrorist”, nën dyshimet për të shtëna në një postbllok të policisë serbe. Më 28 qershor, autoritetet serbe thanë se një pjesëtar i policisë së Serbisë, është plagosur lehtë në një incident në fshatin Dobrosin të komunës së Bujanocit, një nga tri komunat me shumicë shqiptare në jug të Serbisë. Policia serbe tha se “sulmues të panjohur kanë shtënë me armë automatike mbi postbllokun e policisë në afërsi të kufirit me Kosovës”. Kjo është hera e dytë në dy muajt e fundit që raportohet për sulm në të njëjtin vend. Më 17 maj, policia serbe tha se postblloku u qëllua me armë nga drejtimi i Kosovës, por sulmi kaloi pa pasoja në njerëz./Titulli.com/