Zilja po na thërret!

Shkruan: Nagip Taipi

Edhe pse kanë kaluar më shumë se tri dekada kur e pata dëgjuar për herë të parë zilen mekanike që atë botë shërbëtorët e shkollës e mbanin në dore duke na njoftuar se tash është koha për të hyrë në klasë, prapë mendoj njësoj ,se këta vogëlush me një shtator para se ta dëgjojnë zilen e liderëve politik, duhet ta dëgjojnë zilen e shkollës.

Protesta e paralajmëruar nga liderët e ç'dakorduar, të rënë dakord për ç’akordim se nxënësit kanë nevojë për tekste shkollore, mua si prind nuk po më bënë të bindem se ata janë serioz në kërkesat e tyre. Po sikur të ishin aq të interesuar për zgjidhjen e problemit të teksteve nëpër shkollat shqipe,ashtu sikur interesohen për të ardh në pushtet,ky problem do t'ishte zgjidhur shumë herët.

Nëse duhet të protestohet seriozisht për tekstet shkollore edhe për kaosin e krijuar nëpër shkolla, duhet të protestojnë prindërit e fëmijëve, e jo që këtyre të fundit t'ia lëmë në duar fëmijët tanë për të manipuluar me ta për interesat e ngushta politike. Edhe pas 12 vjet qeverisje të shqiptarëve në komunat e Preshevës ,Bujanocit dhe Medvegjës nuk arritën që çështjen e arsimit ta vënë në kategorinë e prioriteteve .

Unë që vazhdimisht kam shprehur pakënaqësinë time për kaosin e krijuar nëpër shkolla nga vete arsimtarët, profesorët dhe institucionet politike të cilat e mbajnë barrën më të madhe për ç'rregullimin e shkollave shqipe, si në punësime pa kritere, ashtu edhe për ndikimin e politikës brenda institucioneve arsimore, gjithmonë kam pas presion nga po të njëjtit lider që sot janë dakorduar për një çështje për të cilën janë fajtor kryesor.

Kësaj here liderët e dakorduar nuk do ta kenë përkrahjen time që fëmijët i mi t’i përdorin si palaço, ndërsa vetë ta kryejnë punën e aktorit prapa skenës, duke lëshuar llojlloj zërash dramatike gjoja se Kësulkuqen do ta kafshoj ujku.

Problemi i teksteve shkollore ekziston prej se janë themeluar institucionet arsimore në Luginë. Kështu që, deri më tash përveç iniciativës së KNSh-së nuk kemi parë nisma serioze për zgjidhjen e kësaj çështje , edhe pse kjo e fundit nuk i qëndroi besnike teksteve të unifikuara nga Shqipëria dhe Kosova, sidomos me masakrimin e Abetares duke zëvendësuar flamurin kuq e zi me fluturën shumëngjyrëshe.

Nëse ju Lider të nderuar kërkesat tuaja për tekstet shkollore i drejtoheni Beogradit ,atëherë protesta ime edhe e gjithë prindërve duhet të drejtohet në adresë tuajën për gjendjen e krijuar nëpër shkolla.

Gjithmonë duke filluar nga moszgjidhja e problemit të teksteve shkollore e deri tek parregullsitë e panumërta që po trashëgohen nga një pushtet në tjetrin.