Sinani prezanton dokumentin e dërguar Qeverisë së Kosovës, kërkon fondin prej 4 milion euro
Kryetarja e komunë së Preshevës, Ardita Sinani ka prezantuar dokumentin e dërguar Qeverisë së Kosovës.
Postimi nga Ardita Sinani:
Dokument i rëndësishëm për të ardhmen e shqiptarëve të Luginës së Preshevës
Në cilësinë e Kryetares së Komunës së Preshevës, kam pasur kënaqësinë të përgatis një dokument të rëndësishëm për Kryeministrin e Republikës së Kosovës, z. Albin Kurti.
Ky dokument reflekton mirënjohjen tonë të thellë për përkushtimin dhe angazhimin e tij të palodhur për shqiptarët e Preshevës, Medvegjës dhe Bujanocit.
Falë vizionit të Kryeministrit Kurti, kemi arritur rezultate historike për qytetarë tanë, përfshirë sigurimin e një linje të rregullt buxhetore dhe mbështetje të pakursyer në fusha kyçe si arsimi, shëndetësia dhe zhvillimi ekonomik.
Dokumenti përmban falënderime për ndihmën e ofruar deri më tani, ndër të cilat:
- Ndihma financiare gjatë pandemisë dhe për përmbytjet në Preshevë
- Rritja e buxhetit për Luginën në 3 milionë euro për vitin 2024
- Financimi i bursave për studentët dhe shpërndarja e librave në gjuhën shqipe
- Angazhimi për ligjin e shtetësisë së Kosovës dhe mbështetja për licencimin e mjekëve
Në këtë dokument propozojmë rritjen e fondit për vitin 2025 në 4 milionë euro në fusha prioritare si arsimi, kultura, sporti, bujqësia dhe ruajtja e trashëgimisë kombëtare, të cilat janë kyçe për zhvillimin dhe mirëqenien e shqiptarëve të Luginës.
Angazhimi i qeverisë së Republikës së Kosovës mbetet një shtyllë e rëndësishme për të siguruar që qytetarët tanë të kenë mundësi të barabarta për zhvillim dhe prosperitet, duke ruajtur identitetin tonë kombëtar.
