“S’ka asnjë arsye bazë që bën këtë vizitë të ndalohet, por thjeshtë vetëm me pretekstin e vetëm që është ministër i një vendi shqiptar e ajo është frika më e madhe. Qeverisë së Serbisë i pengon pjesa ku Kosova apo Shqipëria interesohen për shqiptarët e Luginës së Preshevës. Kjo pjesë është problematika kryesore në të cilën është refuzuar kjo vizitë”, ka deklaruar Rexhepi. 

Sipas nënkryetarit të KKSH-së, kjo nuk është vizita e parë që u refuzua nga autoritetet serbe, e refuzimet siç ka thënë ai, kanë ndodhur edhe vite më parë te disa ministra të Qeverisë së Kosovës. 

“Pritjet për këtë vizitë kanë qenë 50-50, dëshira e madhe ka qenë që ministri Sveçla të jetë këtu...Ka qenë edhe shkaku që rezulton me çështjet që kanë ndodhur në veriun e vendit, kjo është moskapërdirje e shtetit serb që s’e lejon një ministër që i luftoi mercenarët e Serbisë. Ministri është halë në sy në Qeverinë e Serbisë, e kjo është tema kyç që e rëndon edhe më tepër”, është shprehur Rexhepi.

Ai ka theksuar se ftesa për ministrat shqiptarë që të vizitojnë Luginën e Preshevës do të ketë sërish. Duke folur për Marrëveshjen mes Kosovës dhe Serbisë, nënkryetari i Këshillit Kombëtar Shqiptar ka shtuar se “s’ka stabilitet në rajon pa përfshirjen e shqiptarëve të Luginës”.