Forumi i biznesit Kosovë-Serbi, pjesëmarrëse edhe Lugina

Me këtë rast, pjesëmarrës të kësaj ngjarje që organizohet nën patronatin e Odës Ekonomike të Evropës do të jenë afaristët kryesorë të këtyre dy vendeve.

Pjesa e Forumit është edhe Lugina e cila do të përfaqësohet nga Nexhat Behluli, i cili do të jetë i vetmi në cilësinë e të ftuarve nga ky rajon.

Pjesë e B2B2 takimeve në mes prodhuesve nga Serbia dhe Kosova do të jenë edhe prodhuesit nga komuna e Bujanocit : Agro-Adria, Termopan Glass, Profil ing dhe Megall, raporton Titulli.com.

Idea e organizimit të këtij Forumi është që përmes bisedave të drejtpërdrejta të definohen rrugët e përparimit dhe koordinimit drejt zhvillimit ekonomik të Kosovës dhe Serbisë.

Tashmë është e qartë se delegacionin e afaristëve  nga Serbia do ta  udhëheqë kryetari i Odës Ekonomike të këtij shteti,  Marko Çadezh,  dhe drejtori i Zyresë për Kosovë pranë Qeverisë, Marko Gjuriç.

Nga ana tjetër, delegacionit kosovar do t’i prijë  ministrja e ngarkuar për dialog nga Qeveria e Kosovës, Edita Tahiri dhe kryetari i Odës Ekonomike, Safet Gërxhaliu.

Vendimi për organizimin e këtij Forumi ishte  marrë në takimin e fundit i cili është mbajtur në Romë të Italisë, në kuadër të normalizimit dhe zgjerimit të aktiviteteve konkrete në fushën e bashkëpunimit ekonomik  Kosovë-Serbi si dhe eliminimin e pengesave teknike dhe administrative në praktikë.

Oda Ekonomike e Serbisë dhe ajo e Kosovës kohën e fundit i kanë  shpeshtuar takimet zyrtare, ndërsa si produkt i këtyre aktiviteteve, përveç zvogëlimit të barrierave,  janë vërejtur disa  rezultate konkrete në teren  të cilat kanë ndikuar në rritjen e volumit të këmbimeve të mallrave në të dyja drejtimet. /Titulli.com/