Një gjeneratë tjetër me shumë potencial e futbollistëve shqiptarë në Zvicër
Sport

Një gjeneratë tjetër me shumë potencial e futbollistëve shqiptarë në Zvicër

29.Feb.2020 07:31
0

Elis Isufi ka debutuar të enjten në Ligën e Evropës dhe ka rritur praninë shqiptare në skuadrën e madhe zvicerane të futbollit, Basel. Isufi po ashtu ka konfirmuar se në Zvicër po del një gjeneratë tjetër e futbollistëve shqiptarë me shumë potencial.

Janë rreth dhjetë lojtarë të moshës së përafërt me Isufin që këtë edicion po fitojnë për herë të parë hapsirë në skuadrat e Superligës së Zvicrës. Numri më i madh i tyre është te Baseli, prej të cilit klub kanë dalë edhe dy futbollistët më të suksesshëm shqiptarë, Xherdan Shaqiri e Granit Xhaka.

Te Baseli kanë luajtur edhe futbollistë tjerë shqiptarë ndërsa aktualisht janë Taulant Xhaka, Edon Zhegrova e Kemal Ademi. Janë po ashtu të rinjtë: Elis Isufi (19-vjeçar), Orges Bunjaku (18-vjeçar), Jozef Pukaj (20-vjeçar) e Tician Tushi (18-vjeçar). Të gjithë këta janë pjesë e grupmoshave të reja të Zvicrës.

Për ekipin e parë të Baselit tashmë kanë debutuar Bunjaku e Isufi ndërsa Pukaj e Tushi janë fare pranë debutimit.

Elis Isufi ka luajtur një ndeshje për Kupë të Zvicrës më herët, ndërsa të enjten mbrëma luajti në Ligën e Evropës. Baseli fitoi 1:0 ndaj APOEL Nikozisë dhe kaloi në një të tetën e finales.

“Elis Isufi ka qenë i guximshëm dhe i vëmendshëm. Ka luajtur shumë mirë “, ka thënë trajneri i Baselit, Marcel Koller.

Baseli njihet si klub që beson shumë te lojtarët e rinj. Shumë prej lojtarëve që bëjnë karrierë te Baseli depërtojnë në nivel të lartë. Vlerësohet se edhe shkollën e ka shumë të zhvilluar. Te Baseli janë duke u zhvilluar edhe shumë futbollistë tjerë shqiptarë. Kështu që emra të rinj shqiptarë do të dalin në skenë në vitet e ardhshme.

Por futbollistë shqiptarë po dalin edhe nga klubet tjera zvicerane.

Lorik Emini këtë edicion ka luajtur tri ndeshjet e para në Superligën e Zvicrës me Luzernin. Emini është 20-vjeçar dhe po rritet si lojtar përkrah Idriz Vocës e Shkëlqim Demhasajt, dy reprezentuesve të Kosovës.

Liridon Mulaj (21) këtë edicion i ka shtatë ndeshje në Superligë për Xamaxin. Ai kishte luajtur dy ndeshje edicionin e kaluar, por këtë edicion po ka hapësirë dukshëm më të madhe.

Kastriot Imeri është një tjetër futbollist shqiptar që për herë të parë po luan në elitën e Zvicrës. Në tri edicionet e kaluara ai kishte luajtur në kategorinë e dytë zvicerane me Servetten. Tani po luan në Superligë me të njëjtën skuadër, ndërsa ka një gol e dy asistime në 14 paraqitje. 19-vjeçari fundjavën e kaluar shënoi golin e parë, raporton Koha.net

Lavdim Zumberi (20) është pranë ekipit të parë të Zuerichut, kurse Betim Fazliji po shkruan histori me St. Gallenin. 20-vjeçari ka dy gola në 14 paraqitje. St. Galleni nuk ka humbur asnjë ndeshje në të cilën është paraqitur Fazliji. Madje kishte fituar 13 të parat, por fundjavën e kaluar u ndal në barazim.

“Po zhvillohem mirë dhe kjo është me rëndësi. Sa i takon ndeshjeve pa humbje, ne fitojmë bashkë dhe humbim bashkë. Kam pasur disa ndeshje të mira këtë edicion dhe shpresoj të vazhdojë njëjtë”, ka thënë Fazliji për Koha.

Numri i madh i shqiptarëve në Zvicër bënë që prej këtij vendi vazhdimisht të dalin futbollistë shqiptarë. Prej numrit të madh të futbollistëve shqiptarë në Zvicër përfiton Zvicra, por edhe Kosova e Shqipëria.

Van Dijku pritet të bëhet mbrojtësi më i paguar në botë
Çfarë ndodh në Preshevë dhe Bujanoc , arsyet për të vizituar vendbanimet e shqiptarëve
Registration Login
Sign in with social account
or
Remember Me Lost your Password?
Registration Login
Sign in with social account
or
With registration you can comment on post.
Registration Login
Registration