Kurti akuzon Thaçin për presion dhe vlerësime politike
Rajoni dhe Politika

Kurti akuzon Thaçin për presion dhe vlerësime politike

13.Jan.2020 08:37
0

Kryetari i Vetëvendosjes, Albin Kurti, i është përgjigjur letrës së presidentit Hashim Thaçi për caktimin e mandatarit për formimin e qeverisë duke e akuzuar për presion dhe vlerësime politike. 

Ai ka shkruar se së shpejti do të japë propozimin për kryeministër, “porsa të jemi gati”.

“Ne kemi pranuar letrën tuaj të datës 10 janar 2020. Duke dashur të mirëkuptojmë rolin tuaj kushtetues, dua që fillimisht me keqardhje të konstatoj se mesazhi juaj përbën ndërhyrje dhe paragjykim të formimit të institucioneve dhe paralajmërim kërcënues, në këtë rast për subjektin fitues”, ka shkruar Kurti në përgjigjen e tij duke theksuar se “roli i presidentit duhet parë vetëm në kuadër të pozicionit kushtetues që ka, e jo pozicionimit të tij subjektiv dhe politik”.

“Kushtetuta e Kosovës nuk i njeh presidentit diskrecion e as rol aktiv në procesin e caktimit të mandatarit apo edhe të garantimit të një shumice parlamentare për zgjedhjen e Qeverisë në Kuvend. Kjo si rrjedhojë e parimit që quhet ‘zinxhir i legjitimimit kushtetues’ ku i vetmi organ kushtetues që legjitimohet në mënyrë të drejtpërdrejtë nga populli është Kuvendi, andaj, ndaj të njëjtit mund t’i supozohet ose t’i imponohet shprehja e vullnetit nga një organ tjetër sikur që është Presidenti i Republikës”, thuhet tutje në letrën e Kurtit.

Kurti i ka thënë më tej Thaçit se roli i presidentit njihet si ceremonial dhe “Kushtetuta nuk i njeh rol imponues në formimin e Qeverisë”.

“Ai duhet të jetë i durueshëm dhe të presë. Formimi i Qeverisë nuk është i lidhur me afate (përjashtimisht pas mandatimit zyrtar të cilin e bën Presidenti pasi t’i jetë ofruar zyrtarisht emri i kandidatit), për shkak se demokracia nuk është thjesht grumbullim numrash, por përafrim qëndrimesh, harmonizim programesh e bartje përgjegjësish”, ka thënë tutje Kurti.

“Ju lusim që të mos bëni vlerësime politike dhe presion përmes paragjykimit të procesit politik të formimit të qeverisë. Ai proces është i përcaktuar qartë me Kushtetutë dhe i sqaruar në hollësi me aktgjykime të Gjykatës Kushtetuese dhe ku Presidenti nuk mund të bëjë interpretime shtesë”, ka thënë Kurti në letrën e tij teksa në fund ka shtuar se “Ne ende nuk ua kemi dërguar Juve propozimin tonë për Kryeministër. Do ta bëjmë këtë në të ardhmen e afërt, me shkresë zyrtare, porsa të jemi gati”.

“Lëvizja Vetëvendosje! Nuk po e shfrytëzon këtë kohë për të neglizhuar ndërtimin e koalicionit, as edhe të cenojë autoritetin e Presidentit, por me qëllim të arritjes së një marrëveshjeje politike që adreson një dakordim për programin qeverisës, zvogëlim të qeverisë dhe reformat e thella që e presin vendin në muajt e vitet në vazhdim. Kjo është një praktikë normale në gjithë botën demokratike. Me këtë rast, shfrytëzoj këtë letër t’ju informoj që ndodhemi në fazën e finalizimit të marrëveshjes me Lidhjen Demokratike të Kosovës”, ka përfunduar letrën ai.

Më 10 janar, presidenti Hashim Thaçi i kishte kërkuar Kurtit t’i dërgonte emrin e mandatarit për formimin e Qeverisë, madje duke cituar një pikë të aktgjykimit të Kushtetueses, duke aluduar se kur partia fituese nuk dërgon emrin e mandatarit, mund të konsiderohet si refuzim.

Image

Image
Pse po hesht Këshilli Kombëtar Shqiptar për përdorimin e shqipes në shtëpinë e shëndetit në Bujanoc (dokument)
Registration Login
Sign in with social account
or
Remember Me Lost your Password?
Registration Login
Sign in with social account
or
With registration you can comment on post.
Registration Login
Registration