Bujanoc: Kontratë me vlerë mbi 7.9 milionë dinarë për shtrim të rrugëve

Drejtori i Drejtoratit për Ndërtim në Bujanoc sot ka nënshkruar kontratë me vlerë mbi 7.9 milionë dinarë për shtruarjen e rrugëve në rajonin e Klenikut.

Drejtori i ndërmarrjes publike Drejtorati për Ndërtim-Agim Haliti sot ka nënshkruar kontratë me vlerë mbi 7.9 milionë dinarë (me tvsh) me përfaqësuesin e kompanisë “Saba Bellça” nga Presheva për shtruarjen e rrugëve lokale në disa fshatra të komunës së Bujanocit.

Sipas kontratës së nënshkruar punimet duhet të kryhen brenda afatit kohor prej 50 ditëve të punës.

“Kemi të bëjmë me projektin e shtruarjes së rrugëve në Baralevc, Zhbevc, Jabllanic dhe në ato vende të banueshme ku ende nuk ka asfaltime, mirëpo kjo është edhe kërkesë e bashkësive lokale për t’i dhënë prioritet këtyre punimeve, pasi infrastruktura rrugore është elementare për frekuentim të vendasve nëpër komunë të Bujanocit, por edhe vetë qytetin e saj”, theksoi drejtori Haliti me rastin e nënshkrimit të kontratës me kompaninë që do të kryejë punimet.

Nënshkrimi i kontratës së sotme vije pas ndarjes së mjeteve në mbledhjen e fundit të Këshillit Komunal prej buxhetit të rezervave vjetore, raporton Titulli.

Me këtë rast Drejtoratit për Ndërtim iu ndanë 10 milionë dinarë, 8.5 milionë të planifikuara për rregullimin e infrastrukturës në komunë të Bujanocit./Titulli.com/